Eg veit eg har gnåla ein del om den nye modusbrytaren til FH på Slack tidlegare, og ynskjer ikkje å dengje ein daud hest, som dei seier over dammen. 
Likevel kan eg ikkje halde meg for å kome med nokon innspel til. 
Fyrst av alt, ta ein kikk på dette biletet her (ny Z-Wave-brytar til venstre og gammal EnOcean-brytar til høgre):
Eg ser føre meg eit eksperiment der ein hadde stoppa tilfeldige folk på gata, og sagt at ein skulle vise dei to ulike brytarar som var laga for å setje eit smarthus i fire ulike stillingar: Heime, borte, natt og ferie. Gje dei så ti sekund per brytar på å forklare kva for ein knapp som gjer kva.
No har eg ikkje gått så vitskapeleg til verks som dette, det skal seiast. 
Likevel så kjenner eg meg rimeleg sikker på utfallet. Den gamle brytaren var etter mitt syn særs intuitiv. Eg tør påstå at både små ungar og gamle folk utan datakunnskap vil ha få eller ingen problem med å skjøne seg på denne. Den nye, derimot…
For det fyrste så er ikona mykje mindre og (etter mitt syn) alt for detaljerte/“rotete” i høve til storleiken. For det andre så er spesielt borte og ferie alt for like (og dag og natt kan òg vere knotete nok å skilje mellom i halvmørkret). No er det eit par veker sidan eg sette inn den nye modusbrytaren, og både kona og eg står framleis og mysar på han i nokon sekund kvar gong me skal skifte modus for å unngå å trykkje på feil knapp. Med den gamle behøvde me knapt å tenkje ein gong.
Eg skjønar at de har gått for ein bestemt visuell stil i appen, og at de ynskte å ha ein modusbrytar med den same stilen. Greitt nok. Likevel meiner eg at dette rett og slett er skivebom i høve til intuitiv og brukarvenleg utforming.
Ein siste ting: Eg synest innfestinga som fylgjer med verkar særs spinkel med tanke på at brytaren lyt demonterast og monterast att med jamne mellomrom for å skifte batteri. Eg ser ikkje føre meg at desse tynne, små plastikk-mothakane kan tole mange “syklusar” med demontering-montering før dei ryk tvers av. I tillegg så får eg ikkje den brytaren eg har montert til å hengje skikkeleg fast, innfestinga var særs fintfølande med tanke på å klikke på plass som ho skal. Brytaren heng no så nokolunde fast, men eg trur han hadde ramla ut viss eg hadde dunka halvhardt i veggen med knyttneven…
Beklagar viss dette verkar som surmuling frå mi side, for det var ikkje meininga. Eg ynskjer berre å kaste ljos over det eg meiner er enkelte svakheiter med desse brytarane, både i design og montering, slik at de vonleg kan ta dette med dykk som forslag til forbetringar når neste utgåve skal lanserast. 
